Nënkryetari i LDK-së, Lutfi Haziri, ka reaguar pas një sondazhi të publikuar nga për zgjedhjet e ardhshme parlamentare, të cilat e nxjerrin Lëvizjen Vetëvendosje si partinë e parë, teksa LDK-në si partinë e tretë me 16 përqind të votave.
Ai ka akuzuar partinë në pushtet se kanë tentuar që me fushatë ‘sondazhi’ ta sulmojnë subjektin e tij politik.
“Një javë pas opozitarizmit racional e të faktuar, punës së jashtëzakonshme në terren me qytetarët, interpelancës për tenderët njëburimor dhe videos së djeshme të kryetarit të LDK-së, paskan tentuar me fushatë ‘sondazhi’ të na sulmojnë. Ne ecim para drejt rikthimit të madh. Nuk ka kush na ndal. Ne kemi vendosur të punojmë deri në ditën e zgjedhjeve pa u ndal. LDK, shpresë e besë për Kosovën!”, ka shkruar Haziri në Facebook.
Ndaj këtij sondazhi ka reaguar edhe deputetja e LDK-së, Hykmete Bajrami. Ajo ka thënë se realiteti do ta dëshmojë të kundërtën.
“Këtë herë paskan treguar gjenerozitet, na paskan ulur vetëm në 16%. Me sondazhe mund të na ulin edhe më shumë, do ta bëjnë javëve në vijim, por realiteti ndryshon nga sondazhet e tyre. Mbajeni në mend, sa herë që ka një krizë, qeverisë i vjen një sondazh i ri. Herën e kaluar në ditën e faturave dyfish të energjisë elektrike, këtë herë në periudhën e shpërfaqjes së korrupsionit përmes kontratave sekrete e pazareve në katër sy”, ka shkruar ajo. /Kosovatimes/
