Komuna e Gjakovës ka njoftuar se kryetari Ardian Gjini, ka pritur në vizitën e parë zyrtare në komunë, ambasadorin e Britanisë së Madhe në Kosovë, Jonathan Hargreaves.
Sipas njoftimit gjatë takimit, ata diskutuan për situatën e përgjithshme në Kosovë dhe në veçanti për atë në komunën tonë.
Gjini ka informuar ambasadorin Hargreaves për projektet që janë realizuar në Gjakovë dhe punët që po kryhen në vazhdimësi.
Më pas, ata iu bashkuan Konferencës “Romët – Dje, Sot dhe Nesër” të organizuar nga “Roma in Action”, për nder të 8 Prillit – Ditës Ndërkombëtare të Romëve.
Në fjalën e tij para të pranishmëve, Gjini i uroi pjesëtarët e këtij komuniteti për këtë datë të shënuar, duke vënë në pah përkushtimin e deritanishëm të vendit tonë për përfshirjen e tyre në shoqëri dhe vendimmarrje.
“Është bërë shumë në këtë drejtim, por kjo nuk do të thotë që ne duhet të ndalemi këtu, sepse kemi ende punë për të bërë” u shpreh ndër të tjera ai. /Kosovatimes/
