Lidhja Demokratike e Kosovës ka vazhduar me prezantimin e fakteve që kundërshtojnë të dhënat e qeverisë “Kurti”, të cilat sipas kësaj partie janë propagandë dhe të pavërteta.
LDK-ja kësaj radhe ka thënë se Kosova gjatë qeverisjes së Vetëvendosjes nuk ka shënuar progres në indekset ndërkombëtare, si Raporti i BE-së, “World Justice Project e Transparency International”.
“Lidhja Demokratike e Kosovës demanton deklaratat e pavërteta të Qeverisë së Kosovës se Kosova ka përparuar në indekset ndërkombëtare. LDK-ja do t’u gëzohej raporteve po të ishin të vërteta e Kosova të shënonte progres në të gjitha fushat. Në fakt, Qeveria e Kosovës po mundohet të manipulojë me raportet e publikuara tashmë”, thuhet në komunikatë.
“LDK-ja e vlerëson këtë Qeveri si; Qeveri e regresit, propagandës dhe e paaftësisë. LDK-ja po ashtu beson se qytetarët tanë janë të vetëdijshëm të dallojnë propagandën ndaj të gjitha fakteve që po ofrojmë; fakte të publikuara nga institucionet ndërkombëtare e vendore që e demantojnë çdo mashtrim të kësaj qeverie”, thuhet ndër të tjera. /Kosovatimes/
