Zëvendësministri i Drejtësisë, Vigan Qorrolli, ka thënë se Bllaca ka qenë Holokausti i shqiptarëve, në manifestimin e Shënimit të 25-vjetorit të dëbimit të shqiptarëve të Kosovës nga regjimi serb i Millosheviqit.
“Bllaca, si një vendqëndresë plot tymnajë dikur, sot përmes drejtësisë, ajo duhet të ndriçojë. Bllaca dhe kalvari i përjetimeve të rënda lirisht definohet si Holokausti për shqiptarët, ku ekzistenca e shqiptarëve të Kosovës, varej nga mëshira e fatit dhe e shqiptarëve vullnetmirë të Maqedonisë së Veriut”, ka shkruar ai.
Qorrolli si i mbijetuar i Bllacës ka thënë se aty i ka pasur ditët më të rënda në jetën e tij.
“Duke qenë njëri prej refugjatëve bashkë me familjen time si përjetues i drejtpërdrejt i kalvarit të eksodit në fillim prillin e vitit 1999, në këtë vend, besohet që pikën kufitare të Bllacës, në territorin e Maqedonisë së Veriut, vetëm në javën e parë të prillit 1999 qëndruan disa qindra mijë kosovarë, të ardhur me tren, me makina, por edhe në këmbë, që qëndruan aty disa ditë derisa u zgjidh çështja e kampeve të refugjatë brenda vendit dhe transportimi i tyre në vende të treta”, ka shkruar Qorrolli. /Kosovatimes/
