Në Ditën Ndërkombëtare të Romëve ka reaguar edhe Ambasada e Shteteve të Bashkuara të Amerikës, e cila thotë se së bashku me institucionet e Kosovës dhe shoqërinë civile po punojnë vazhdimisht për integrimin e romëve në institucione.
Me 8 Prill, me rastin e Ditës Ndërkombëtare të Romëve, sipas kësaj ambasade, festohet kultura, gjuha, trashëgimia dhe aspiratat e pasura të komunitetit romë në mbarë botën.
“Ambasada Amerikane në Kosovë vazhdon të punojë me institucionet kosovare dhe organizatat e shoqërisë civile drejt përfshirjes dhe integrimit të mëtejshëm të romëve dhe të gjitha komuniteteve në mbarë Kosovën. Së fundmi, stafi i Ambasadës pati një takim me anëtarë nga organizatat e shoqërisë civile rome, ashkali dhe egjiptiane ku dëgjuam drejtpërdrejt nga anëtarët e komunitetit për punën e tyre dhe sfidat me të cilat përballet ende komuniteti në Kosovë”, thuhet në njoftimin për media nga Ambasada në Prishtinë. /Kosovatimes/
