Mandati i deputetes socialiste, Olta Xhaçka, nuk do të shqyrtohet nga Gjykata Kushtetuese. Kuvendi votoi të enjten kundër nismës së opozitës për të çuar mandatin e deputetes së PS-së në Gjykatën Kushtetuese, me qëllimin për ti hequr asaj mandatin.
Kuvendi votoi me 72 vota kundër dhe 39 pro. Votat kundër ishin nga shumica, ndërsa votat pro nga opozita.
Deputetja Xhaçka, gjatë seancës parlamentare kur po diskutohej për mandatin e saj, hodhi poshtë akuzat e opozitës për konflikt interesi, lidhur me statusin që ka marrë bashkëshorti i saj, Artan Gaçi në fillimin e vitit 2022 për ndërtimin e një resorti në Dhërmi.
Xhaçka e bëri të qartë se bëhet fjalë për një status të investitorit të asistuar që ndryshon shumë, sipas saj, nga ai i investitorit strategjik.
“Unë dhe familja ime nuk kemi përfituara asnjë qindarkë nga fondet publike, zero! Asnjë m2 tokë publike zero! Asnjë lehtësi proceduriale të ndryshme nga gjithë të tjerët. E dini se çfarë është përfitimi nga statusi i investitorit strategjik të asistuar? Nuk është aspak i barabartë me atë të investitorit strategjik që thoni ju. Përfitim, që në çdo rast, ligjërisht nuk i atribuohet fare drejtpërdrejt bashkëshortin tim në hoteleri, që kurrë mos u bëftë, pas baltës së pamerituar që solli në jetën tonë, por kompanisë që në një të ardhme do të menaxhojë aktivitetin. Vetëm e drejta për tu trajtuar me prioritet për lidhjen e njërës prej 1500 kontratave të përvitshme të qirasë për sipërfaqen e plazhit para hotelit. A lejohet potencialisht kur të kryhet investimi, kur të lidhet kontrata që mund të mos ndodhë kurrë, të vërë apo të mos vërë shezllonë në plazh? Jam e bindur që gjysma e sallës me këtë interpretim ligjor është në papajtueshmëri të mandatit”, tha Xhaçka në Kuvend.
Në një prononcim për mediat pas votimit, deputeti i opozitës, Gazment Bardhi e konsideroi një mesazh mafioz të shumicës socialiste rrëzimin e kërkesës për mandatin e deputetes, Olta Xhaçka.
Sipas tij, mesazhi mafioz që Edi Rama i përcolli sot SPAK është se nuk mund ta prekë Xhaçkën.
“Nuk zbaton vendimin e Gjykatës Kushtetuese. Është një ditë e zezë për Shqipërinë. Ne duhet të marrim një vendim nëse do të duhet t’i drejtohemi më Gjykatës Kushtetuese. Nga sot nuk e kuptoj se për çfarë do të paguhen anëtarët e Gjykatës Kushtetuese?” theksoi Bardhi.
Raportet e pozitës dhe opozitës
Deputetja e Partisë Socialiste, Klotilda Bushka paraqiti të enjten në seancë plenare raportin e shumicës të Këshillit për Rregulloren, Mandateve dhe Imunitetit me objekt, “konstatimin e pavlefshmërisë dhe mbarimin e mandatit të deputetes Olta Xhaçka”.
Bushka u shpreh se “ne jemi mbledhur për të trajtuar një çështje procedurale kushtetuese, nuk jemi as në gjyq politik, as para një prokurori publik politik që i bën pyetje një deputeti të Kuvendit.”
Sipas saj, Olta Xhaçka, përmes përfaqësuesit ligjor ka ndenjur 10 orë në Gjykatën Kushtetuese dhe i ka dhënë përgjigje të gjitha pyetjeve dhe pretendimeve të palëve, si dhe ka çuar 500 faqe me dokumente që mbështesin argumentet e saj.
“Në fund Gjykata Kushtetuese nuk ka disponuar nëse ka përputhshmëri mandati apo jo, por thjesht ka pushuar çështjen. Xhaçka ka qenë në dispozicion të drejtësisë kushtetuese. Në sajë të reformave kushtetuese punët janë të ndara, drejtësia është e pavarur në punën e vetë. Ju ngrini këtu çështje që janë objekt i punës së drejtësisë së pavarur dhe na anatemoni ne se nuk mbështesim reformën në drejtësi”, iu drejtua Bushka deputetëve të opozitës.
Sipas saj, vendimet e Gjykatës Kushtetuese janë të detyrueshme për zbatim dhe Gjykata Kushtetuese është autoriteti fundor që njeh ligji.
“Nuk bëhet fjalë për mandatin e Xhaçkës apo dikujt tjetër. Është fjala për standarde kushtetuese dhe balancat e demokracisë. Nuk mund të përdorni çështje të caktuara me interes kushtetues për qëllim politike. Për ne zbatimi i standardeve kushtetuese është parësor”, tha ajo.
Ndërsa Gazment Bardhi, i cili më herët paraqiti në seancë raportin e opozitës, u shpreh se “raporti i mazhorancës nuk ka asnjë qëndrim”.
“Përpara se të kalojë për votim do duhet të dimë se për çfarë të votojmë. Raporti i shumicës nuk ka asnjë qëndrim sa i takon kësaj çështje. Si rregull duhej raport i përbashkët. Çfarë duhet të votojmë. Raportin që Bushka lexoi, Gjykata Kushtetuese e ka gjetur antikushtetues. Mesazhi që u jepni qytetarëve është se asnjë vendim gjykate nuk ka vlerë nëse s’na pëlqen. Këtu nuk ka më shtet ligjor”, tha ai.
