Ministri i Bujqësisë, Faton Peci, ka, njoftuar se së bashku me ministrin e MPBAP, Xhelal Sfeqla, kanë vizituar sot veriun e vendit.
Në postimin e tij në ‘Facebook’, Peci ka publikuar disa fotografi në një mal në veri të Kosovës. Ai ka thënë se pas më shumë se 10 viteve stagnim, tani është në fuqi Ligji i Ri i Pyjeve.
“Në kuadër të aktiviteteve dhe përgjegjësive institucionale, së bashku me ministrin Xhelal Sfeçla, ishim sot në veriun e vendit. Pas më shumë se 10 viteve stagnim, tani kemi në fuqi Ligjin e Ri të Pyjeve”, ka shkruar ai në ‘Facebook’.
Peci ka thënë se Ligji i ri i Pyjeve i bartë kompetencat e mbrojtjes së pyjeve nga niveli lokal në atë qendror. “Me përgjegjësi të reja rritet niveli i përgjegjësisë për menaxhim të qëndrueshëm dhe shfrytëzim të pyjeve. Në komunat veriore do të rekrutojmë staf të ri të cilët do të kenë përgjegjësinë për mbrojtjen e pyjeve”, ka shkruar tutje Peci. /Kosovatimes/
