Norvegjia është e gatshme të njohë shtetin palestinez në bashkëpunim me vendet e tjera, tha sot kryeministri norvegjez Jonas Gar Stoere (Gahr Stoere) në prani të kolegut të tij spanjoll Pedro Sanchez (Sanchez), i cili mbron një njohje të tillë.
“Norvegjia është e gatshme të marrë një vendim për njohjen e shtetit palestinez. Ky vendim duhet të merret në bazë të kohës dhe kontekstit, në bashkëpunim të ngushtë me vendet me të njëjtin mendim. Nuk kemi caktuar një datë specifike”, tha Stjore në Oslo në një konferencë të përbashkët për shtyp me Sanchez.
Në nëntor, parlamenti norvegjez miratoi një mocion duke i kërkuar qeverisë të jetë gati të njohë një shtet të pavarur palestinez.
Norvegjia priti gjithashtu bisedimet e para të paqes izraelito-palestineze në fillim të viteve 1990, kur u arrit një marrëveshje, por nuk u zbatua, për bashkëjetesën paqësore midis dy shteteve të pavarura.
Kryeministri spanjoll këtë javë nisi një turne në Poloni, Norvegji dhe Irlandë për të diskutuar “nevojen për të ecur drejt njohjes së Palestinës”.
“Spanja është e angazhuar publikisht për të njohur një shtet palestinez sa më shpejt të jetë e mundur, kur kushtet janë të përshtatshme dhe në mënyrë të tillë që të ketë ndikimin më të fortë pozitiv të mundshëm në procesin e paqes”, tha Sanchez në Oslo.
Sipas shkrimit të mediave spanjolle që shoqëruan Sanchezin në turneun e javës së kaluar në Jordani, Arabinë Saudite dhe Katar, kryeministri i Spanjës përmendi më pas fundin e qershorit si një datë të mundshme për njohjen e Palestinës.
“Unë mirëpres iniciativën e kryeministrit Sánchez për të konsultuar vendet me të njëjtin mendim për të forcuar koordinimin dhe ne do ta forcojmë këtë koordinim në javët e ardhshme”, tha kryeministri norvegjez.
Përndryshe, Sanchez është shumë kritik ndaj qëndrimit të qeverisë izraelite të kryesuar nga Benjamin Netanyahu që nga fillimi i konfliktit në Gaza.
Lufta midis forcave izraelite dhe lëvizjes palestineze Hamas filloi më 7 tetor në Rripin e Gazës.
