Me hyrjen në fuqi të Ligjit të ri për rregullat e trafikut rrugor, Policia e Kosovës ka vazhduar me aktivitetet sensibilizuese në terren dhe zbatim të këtij ligji, ku nga data 3 prill kur ka hyrë në fuqi ky ligj e deri me datë 11 prill, janë shqiptuar gjithsejtë 15,347 kundërvajtje.
Sipas policisë, në fokus kanë qenë kundërvajtjet që paraqesin rrezik për pjesëmarrësit në trafik dhe janë shkaktar më të shpeshtë të aksidenteve.
“6923 kundërvajtje janë shqiptuar për tejkalim të shpejtësisë; 1205 kundërvajtje për mos përdorim të rripit të sigurisë; 639 kundërvajtje për përdorim të telefonit gjatë ngasjes; 63 kundërvajtje për tejkalim në vijë të plotë apo vende të ndaluara; 18 kundërvajtje për ngasje nën ndikim të alkoolit”, njofton Policia.
Kjo e fundit apelon të gjithë pjesëmarrësit në trafik që t’iu përmbahen dispozitave ligjore, të rritet vigjilenca në rrugë, të shtohet kujdesi në respektimin e rregullave që dalin nga ligjet dhe rregullat e trafikut, me qëllim siç thuhet, për të garantuar sigurinë për të gjithë pjesëmarrësit në trafik dhe parandalimit të aksidenteve, në veçanti atyre me lëndime dhe pasoja fatale. /Kosovtimes/
