Mundësia e një sulmi iranian ka ngritur shqetësim dhe ankth në Tel Aviv. Kryeministri izraelit Benjamin Netanyahu mblodhi zyrtaret më të lartë të kabinetit të tij, për të diskutuar rreth planit të mëtutjeshëm ndaj Iranit.
Sipas mediave lokale, tensionet janë të larta lidhur me mundësinë që Teherani të hakmerret për një sulm ajror që vrau komandantë të lartë iranianë dy javë më parë, ku 13 persona u vranë në një sulm me raketa në konsullatën iraniane në kryeqytetin sirian Damask.
Izraeli nuk e ka marrë përgjegjësinë për sulmin, por konsiderohet gjerësisht se e ka kryer atë.
Zëdhënësi i Këshillit të Sigurisë Kombëtare të ShBA-së, John Kirby, tha për medie se Irani mund të përdorë më shumë se 100 dronë, dhjetëra raketa lundrimi dhe ndoshta edhe raketa balistike drejt Izraelit.
Ai shtoi se kërcënimi iranian është i besueshëm. Presidenti Joe Biden i ka premtuar tashmë Izraelit mbështetjen “e hekurt” ndaj vendit të tij në rast të një sulmi iranian.
Tensionet në rritje kanë përfshirë ShBA-në, Britaninë e Madhe, Indinë dhe Australinë ku të njëjtit kanë kërkuar nga qytetarët e tyre të mos udhëtojnë drejt Izraelit.
