Ministri i Brendshëm, Xhelal Sveçla, i tronditur nga rasti vrasjes së një gruaje në Ferizaj tha se ky akt duhet të shërbejë si një thirrje për një reflektim nga e gjithë shoqëria dhe si institucione.
“Jam tronditur thellësisht nga vrasja e sotme, nga humbja e edhe një gruaje të Kosovës dhe nga rrethanat e rënda të kësaj vrasjeje mizore”, tha ai.
Sipas tij përkundër përpjekjeve për rritjen e sigurisë për vajzat dhe gratë, rastet si vrasja e sotme, janë thirrje për reflektim për të gjithë ne, si institucione dhe si shoqëri.
“Përgëzoj Policinë e Kosovës për reagimin e shpejtë në arrestimin e dorasit dhe do të kujdesem që të ndërmarrim gjithçka që na takon si Ministri e Punëve të Brendshme në zbardhjen e të gjitha rrethanave të rastit dhe përgjegjësisë së secilit zyrtar. Pavarësisht arrestimit të dorasit, është e domosdoshme sjellja e drejtësisë pa vonesë. I shpreh ngushëllimet e mia të sinqerta familjes së të ndjerës ndërsa të plagosurit i uroj shërim të shpejtë!”, ka thënë ai. /Kosovatimes/
