Një zyrtar i lartë kinez udhëtoi në Korenë e Veriut për të diskutuar përmirësimin e bashkëpunimit në takimin e nivelit më të lartë në pesë vitet e fundit, njoftuan sot media shtetërore e Koresë së Veriut.
Kryetari i Kongresit Popullor Kombëtar Kinez Zhao Lei, zyrtari i tretë më i lartë në Partinë Komuniste në pushtet, mbërriti mbrëmë në Korenë e Veriut dhe vizita e tij do të zgjasë deri nesër.
Menjëherë pas mbërritjes së tij, Zhao u takua me homologun e tij koreano-verior Choe Ryong Hae dhe diskutoi se si të promovohen shkëmbimet dhe bashkëpunimi në të gjitha fushat si politika, ekonomia dhe kultura.
Të dy shkëmbyen gjithashtu pikëpamje mbi çështje të tjera rajonale dhe ndërkombëtare me interes të përbashkët, tha KCNA.
Zhao është një nga shtatë anëtarët e Komitetit të Përhershëm të Byrosë Politike, organit më të lartë qeverisës të Partisë Komuniste të kryesuar nga udhëheqësi kinez Xi Jinping. Vizita e tij në Korenë e Veriut shënoi shkëmbimin e parë dypalësh që përfshin një anëtar të Komitetit të Përhershëm të Byrosë Politike të Kinës që nga fillimi i pandemisë së koronavirusit.
Ai pret që Koreja e Veriut dhe Kina të mbajnë takime të shumta me rastin e 75-vjetorit të vendosjes së marrëdhënieve diplomatike.
Koreja e Veriut po kërkon të forcojë bashkëpunimin me Kinën dhe Rusinë përballë konfliktit me SHBA-në dhe Korenë e Jugut për programin e saj bërthamor.
Kina besohet se prej kohësh ka ofruar ndihmë për Korenë e Veriut në kundërshtim me sanksionet ndërkombëtare.
