Kryetari i Podujevës, Shpejtim Bulliqi, e ka dënuar ashpër sulmin fizik dhe verbal ndaj dy punëtorëve shëndetësorë në Qendrën Kryesore të Mjekësisë Familjare në këtë qytet.
QKMF në Podujevë ka bërë të ditur se mbrëmë rreth mesnatës një infermiere është sulmuar verbalisht dhe një infermier fizikisht.
“E dënoj ashpër sulmin fizik dhe verbal që ka ndodhur ndaj dy punëtorëve shëndetësorë mbrëmë në Qendrën Kryesore të Mjekësisë Familjare në Podujevë”, ka shkruar Bulliqi në Facebook.
Ai ka thënë se sulmet e tilla ndaj punëtorëve shëndetësorë janë të papranueshme, veçanërisht në vendin e punës, ndërsa tolerimi i tyre krijon precedent të rrezikshëm për të ardhmen duke nxitur pasiguri në punë në mesin e komunitetit shëndetësor.
Bulliqi u ka uruar shërim të shpejtë të lënduarve, teksa u ka bërë thirrje organeve të rendit ta trajtojnë shpejt këtë rast.
“I bëj thirrje organeve të rendit ta trajtojnë shpejt dhe me prioritet këtë rast dhe keqbërësi ta marrë dënimin meritor për kanosje fizike ndaj zyrtarëve publik. Të lënduarve ju uroj shërim të shpejtë!”, ka shkruar tutje Bulliqi në Facebook. /Kosovatimes/
