Kryetari i Aleancës për Ardhmërinë e Kosovës, Ramush Haradinaj, ka kujtuar “Betejën e Zhegocit” në 25-vjetorin e saj, duke thënë se ende drejtësia nuk ka ardhur.
Haradinaj përmes një postimi në llogarinë e tij në Facebook, ka thënë se duke kujtuar sot Betejën e Zhegocit, nderojmë kontributin e Zonës Operative të Karadakut, rezistencën, sakrificën dhe rënien e bijve të saj.
Haradinaj në shkrimin e tij ka kujtuar gjithashtu martirët e rënë në Sllovi të Lipjanit dhe në Lagjën e Boshnjakëve në Mitrovicë.
“Po të njëjtën ditë, për të shfryer egërsinë dhe mllefin e humbjeve në frontet e luftës, pikërisht gjatë Betejës së Zhegocit, armiku do të sulmonte popullatën e paarmatosur në Sllovi të Lipjanit, duke vrarë civilë të pafajshëm shqiptarë. Njëjtë do të pësonin edhe motrat e vëllezërit tonë në Lagjen e Boshnjakëve në Mitrovicë”, ka shkruar ai. /Kosovatimes/
