Ministrja e Drejtësisë, Albulena Haxhiu është takuar me ministrin e Drejtësisë së Malit të Zi, Andrej Milovic.
Sipas raportimit të medias malazeze CDM gjatë takimit është diskutuar për rastin e Ekrem Bajroviqit, i cili ndodhet në burg në Kosovë për gati një vit e gjysmë, me akuzën për krime lufte gjatë viteve ’98-99. Ministri malazez ka kërkuar gjykim të drejtë në përputhje me standardet juridike ndërkombëtare për këtë rast.
Ndërkaq, temë e diskutimit përgjithësisht kanë qenë bashkëpunimet gjyqësore ndërmjet dy vendeve, duke përfshirë tre traktatet dypalëshe në fushën e ndihmës juridike ndërkombëtare në çështjet penale: Traktati për Ndihmën Juridike në Çështjet Penale, Traktati për Ekstradimin dhe Traktati për Zbatimin e ndërsjellë të Vendimeve të Gjykatës në Çështjet Penale.
Qëndrimi i dy ministrave është se i gjithë procesi duhet aktualizuar dhe përmbyllur në mënyrë që bashkëpunimi gjyqësor mes dy vendeve të bëhet i saktë dhe efektiv. Kjo lidhet veçanërisht me problemin e ekstradimit të individëve të kërkuar nga gjyqësori i një vendi tjetër, nga i cili Mali i Zi do të përfitonte veçanërisht në të ardhmen.
