Ministri i Brendshëm estonez Lauri Laanemets tha se është gati t’i propozojë parlamentit të vendit (Riigikogu) që të shpallë Patriarkanën Ortodokse me qendër në Moskë një organizatë terroriste, njoftoi televizioni estonez ERR .
Laanements sqaroi se kishat nuk do të mbyllen, por se komunikimi me Moskën do të ndërpritet. Ai e shpjegoi qëllimin e tij duke thënë se kisha e Moskës është nën kontrollin e drejtpërdrejtë të Putinit, i cili inkurajon terrorizmin dhe tërhoqi një paralele me ekstremizmin islamik.
Kisha Ortodokse Estoneze e Patriarkanës së Moskës (MPEOK) është në varësi të Patriarkanës së Moskës, por sipas planit të ministrit, ajo nuk do të etiketohet në të njëjtën mënyrë, pra si organizatë terroriste. Ministri tha se qëllimi përfundimtar është ndalimi i Patriarkanës së Moskës të funksionojë në Estoni.
“Lidhjet historike”
Duket se edhe Kisha Ortodokse Estoneze dëshiron të distancohet nga deklaratat e Moskës për të mos u ndaluar. Duke folur në një konferencë shtypi në fillim të kësaj jave, një përfaqësues i MPEOK estonez tha se organizata nuk është drejtpërdrejt përgjegjëse ndaj Patriarkanës së Moskës ose Patriarkut Kirill dhe për këtë arsye nuk mund të mbahet përgjegjëse për deklaratat e tyre në mbështetje të Rusisë për luftën në Ukrainë. MPEOK ka mbi 100,000 ndjekës në Estoni. Megjithatë, ata thanë me kujdes se kanë “lidhje kanonike” me Moskën dhe se janë “të lidhur historikisht”.
Reagimi i Moskës
Zëdhënësi i Kremlinit Peskov tha se deklarata e ministrit estonez nuk ishte “nga më të zgjuarit” dhe se ai nuk dëshiron të komentojë fare. Zëdhënësja e Ministrisë së Punëve të Jashtme, Zaharova u shpreh shumë më e ashpër, duke thënë se deklarata ruan “të gjitha shenjat e sëmundjes mendore”.
