Presidentja e Republikës së Sllovenisë, Nataša Pirc Musar, në Forumin Ndërkombëtar për Gratë, Paqen dhe Sigurinë, ka mirëpritur vendimin për themelimin e qendrës rajonale të ekselencës për gratë, paqen dhe sigurinë në Kosovë.
“Duhet të luftojmë për paqe dhe siguri në çdo nivel dhe kjo konferencë nuk mund të ishte në një kohë më të duhur kur në përgjithësi gjendja nuk është e mirë. Ne duhet të mendojmë edhe për gratë e Ukrainës, të cilat agresioni rus në këto momente kur ne po flasim i ka vendosur në vijat e para të frontit. Le t’i kujtojmë gratë në Gaza, mijëra prej tyre kanë vdekur dhe mijëra të tjera po vdesin urie”, ka deklaruar ajo para të pranishmëve.
Sipas Pirc Musar agjenda për gratë, paqen dhe sigurinë është prioritet i tyre dhe se Sllovenia është e përkushtuar për këtë drejtim.
“Është e papranueshme që dhuna seksuale të përdoret si armë lufte, dhe ky krim duhet ndëshkuar, sepse nëse dhuna mbetët e pandëshkuar, ajo bëhet shkas që dhuna seksuale në konflikte të përsëritet”, ka thënë presidentja sllovene.
Ajo ka thënë duhet ngritur zërin kundër dhunës ndaj grave dhe burrave.
“Ngritja e vetëdijes mbi dhunën seksuale në konflikte duhet të përfshihet në të gjitha vendet si politikë”, ka thënë presidentja sllovene.
