Kryeministri armen Nikol Pashinyan deklaroi sot gatishmërinë e tij për të lidhur një marrëveshje paqeje me Azerbajxhanin bazuar në dispozitat e Deklaratës së Almatit të vitit 1991.
Pashinyan, i cili ndodhet për një vizitë zyrtare në Astana, ka biseduar me Presidentin e Kazakistanit Kasim-Jomart Tokayev për situatën e sigurisë dhe stabilitetin në Kaukazin e Jugut.
“Armenia është e gatshme të nënshkruajë një marrëveshje me Azerbajxhanin brenda parimeve të dakorduara më parë për hir të stabilitetit dhe paqes në rajon, bazuar në tre parimet e dakorduara tashmë midis Armenisë dhe Azerbajxhanit”, tha kryeministri i Armenisë, transmeton Armenpress.
Ai kujtoi se bëhet fjalë për njohjen reciproke të integritetit territorial bazuar në dispozitat e deklaratës së miratuar në qytetin Almaty të Kazakistanit më 21 dhjetor 1991 dhe zbatimin e procesit të demarkacionit të kufirit armeno-azerbajxhanas, si dhe zhbllokimin e infrastrukturës rajonale bazuar në parimet e respektimit të sovranitetit dhe juridiksionit të shteteve, reciprocitetit dhe barazisë.
