Kanë nisur sot (e hënë) punimet e fazës së dytë për ndërtimin e Unazës Qendrore që lidh lagjen “Arbëria”. Në vendpunishte dolën edhe kryetari i komunës së Prishtinës, Përparim Rama dhe drejtori i Investimeve Kapitale, Krenar Xhaferi.
Kryetari Rama tha se tha se ky projekt do të jetë një ndihmesë e madhe për Prishtinën.
“Në fillim të një projekti madhor me interes të madh për kryeqytetin, këtu kemi pasur një ndërprerje të punimeve me dekada. Sot po fillojmë ta ndërlidhim pjesën e Arbërisë me Unazën e Madhe në kryeqytet, e cila do t’i ndihmojë shumë trafikut. Kjo do të mundësojë të ndërlidhin edhe pjesë të ndryshme, tashmë me platforma edhe për këmbësorë, që ta bëjmë ndërlidhjen e Arbërisë me qendrën e kryeqytetit e t’u ofrojmë një mundësi shtesë qytetarëve që, përveç infrastrukturë së makinave, jemi duke e krijuar e po e krijojmë paralelisht edhe infrastrukturën për këmbësorë”, tha Rama.
I pari i kryeqytetit tha se ky projekt pritet të përfundojë brenda 120-ditësh.
“E kemi një plan dinamik 120-ditësh. Shpresoj të veprojmë përbrenda këtij plani dinamik. Nuk kemi asnjë arsye për vonesë dhe jam optimist që brenda 120 ditëve ta kemi këtë pjesë të përfunduar. Kjo është pjesë e planifikimeve të transformimit të kryeqytetit”, deklaroi Rama.
Ndërkaq drejtori i Investimeve Kapitale, Krenar Xhaferi, njoftoi se ky projekt kap vlerën 3.3 milionë euro.
