Ministri i Jashtëm izraelit, Israel Katz tha se ai po u bën thirrje vendeve të vendosin sanksione ndaj programit raketor të Iranit
Irani do t’i përgjigjet çdo veprimi kundër interesave të tij, tha presidenti Ebrahim Raisi , sipas agjencisë ISNA, një ditë pasi Izraeli paralajmëroi se do t’i përgjigjet një sulmi të kryer nga Teherani fundjavën e kaluar me dronë dhe raketa.
“Ne deklarojmë kategorikisht se edhe veprimi më i vogël kundër interesave iraniane me siguri do të ketë një përgjigje serioze, të gjerë dhe të dhimbshme për çdo autor,” i tha Raisi emirit të Katarit, Sheikh Tamim bin Hamad Al Thani .Shefi i ushtrisë izraelite Herzi Halevi tha të hënën se sulmi i Iranit ndaj Izraelit, si hakmarrje për bombardimin e 1 prillit të konsullatës iraniane në Damask, kërkon një përgjigje.
Zëvendësministri i Jashtëm i Iranit, Ali Bagheri Kani tha në televizionin shtetëror të hënën vonë se kundërofensiva e Teheranit, pas çdo reagimi izraelit, do të vijë “brenda pak sekondash duke pasur parasysh se Irani nuk do të presë 12 ditë për të reaguar”.
Irani nisi një sulm me dron dhe raketa ndaj Izraelit gjatë fundjavës në përgjigje të një sulmi të fundit në ambasadën iraniane në Damask për të cilin fajësoi Izraelin. Sulmi iranian u ndal dhe nuk shkaktoi dëme apo viktima.
Ministri i Jashtëm izraelit, Israel Katz, tha të martën se po u bënte thirrje vendeve që të vendosin sanksione ndaj programit raketor të Iranit dhe të caktojnë Gardën Revolucionare të saj si një organizatë terroriste pas sulmit të parë të drejtpërdrejtë të Iranit ndaj Izraelit.
“Përveç përgjigjes ushtarake ndaj lëshimeve të raketave dhe dronëve, unë jam duke udhëhequr një sulm diplomatik ndaj Iranit”, tha Katz në një postim në mediat sociale.
Katz shtoi se ai ka dërguar letra në 32 vende dhe ka folur me shumë kolegë, duke u kërkuar atyre “të vendosin sanksione ndaj programit raketor të Iranit dhe të shpallin Gardën Revolucionare një organizatë terroriste si një mënyrë për të ndaluar dhe dobësuar Iranin”.
“Ne duhet ta ndalojmë Iranin tani, para se të jetë tepër vonë”, thotë Katz.
Izraeli tha se do t’i përgjigjet sulmit me raketa dhe dron të Iranit gjatë fundjavës, pavarësisht thirrjeve nga aleatët për përmbajtje për të shmangur një përshkallëzim të konfliktit në Lindjen e Mesme.
Grupi i shtatë vendeve më të zhvilluara industrialisht, G7, tashmë po punon për një paketë masash të koordinuara kundër Iranit, njoftoi kryeministri britanik Rishi Sunak .
