Shërbimi Korrektues i Kosovës ka mbajtur të mërkurën Konferencën e Donatorëve, me ç’rast u prezantua gjendja ekzistuese e institucioneve korrektuese, si dhe janë prezantuar projektet përmes të cilave synohet ngritja dhe zhvillimi i përgjithshëm i Shërbimit Korrektues të Kosovës.
Drejtori Përgjithshëm i Shërbimit Korrektues të Kosovës, Ismail Dibrani, me këtë rast ka bërë të ditur se vetëm gjatë tri viteve ShKK-ja ka parandaluar kontrabandimin e 130 rasteve brenda institucioneve korrektuese.
Ai tha se ShKK-ja viteve të fundit ka shënuar rezultat në të gjitha aspektet.
“Gjatë këtyre tri viteve kemi arritur që së paku 130 raste të parandalojmë futjen e kontrabandës brenda institucioneve korrektuese. Ajo që është shumë e rëndësishme si asnjëherë më parë ShKK-ja nga koha kur për investime kapitale kishim më pak se 1 milion euro, këtë vit ka buxhet prej 8 milion euro”, tha ai, duke shtuar se është filluar projektimi i institucioneve të reja dhe se ky projektim është duke u bërë në bashkëpunim me partnerët dhe shoqërinë civile.
Ambasadori i OSBE-së, Michail Davenport, duke e komentuar gjendjen në shërbimet korrektues në Kosovë, tha se ndjehet i lumtur pasi është shtuar numri i grave në këtë institucion.
Davenport tha se mbështetja për institucionet e sigurisë publike në Kosovë që ofrojnë siguri për të gjitha komunitetet është prioritet i dorës së parë për OSBE-në në Kosovë.
“Si OSBE ne kemi respekt të lartë për rolin e rëndësishëm që luan ShKK-ja në ofrim të burgimit të sigurt që fokusohet në dinjitet dhe rehabilitim të të burgosurve. Ne kemi qenë të lumtur që kemi parë shtim të grave të punësuara në ShKK. Mirëpresim fokusin në shkathtësi, fokusin në ekspertizë, menaxhimin e konflikteve dhe ofrimin e shërbimeve të rehabilitimit në mënyrë më efektive”, tha ai.
Ndërsa, zëvendësministri i Drejtësisë, Blerim Sallahu, tha se janë duke punuar për përmirësimin e kushteve brenda burgjeve.
Ai tha se institucioni i sistemit korrektues përfshin ndërmarrjen e veprimeve nga kryerja e niveleve penale deri të largimi nga institucioni korrektues pas rehabilitimit efektiv.
“Deri këtu gjithçka do të konsiderohej në rregull sikur ndonjëherë parandalimi dhe rehabilitimi nuk do të ishin mjet i anashkaluar. Të dyja janë mjete kritike dhe të rëndësishme për të siguruar një sistem efektiv drejtësie, por fatkeqësisht rastet e ngjarjeve të djeshme apo tjetra e para disa ditëve, vrasjet e grave dhe fenomenet e tjera të errëta po dështojnë të parandalohen me kohë”, tha ai.
Kurse, shefi i EULEX-it, Giovanni Barbano, tha se vrasja e dy grave brenda kësaj jave në Kosovë është një tragjedi dhe se duhet punë e përbashkët që këto vrasje të parandalohen.
“Dy jetë u shuan shumë herët nga errësira e dhunës. Ato u vranë mizorisht. Tragjedia e femicidit dhe dhunës me bazë gjinore na shërben si përkujtesë e rrezikut që vazhdon të qëndron në shoqërinë tonë. Përballë mizorive të tilla nuk mjafton që të pranohet problemi por duhet të punojmë aktivisht në zgjidhje. Një aspekt për të është përmes institucioneve korrektuese. Ato luajnë një rol kyç që kryerësit të mbahen përgjegjës”, tha ai.
E përfaqësuesja ambasadës amerikane, Tamra Greig, tha se ShBA-të janë të brengosura për dhunën në familje ndaj grave në Kosovë që po vazhdon.
“Ne me kënaqësi kemi mbështetur ShKK-në për vite të shumta. ShKK-ja po luan një roli vital dhe janë çelës për sigurimin e rendit publik në Kosovë”, tha ajo.
