Kryetari i Aleancës për Ardhmërinë e Kosovës, Ramush Haradinaj, ka reaguar të enjten kundër arrestimit të policëve kosovarë nga autoritetet e Serbisë, ndërsa ka kërkuar nga institucionet e Kosovës që të veprojnë reciprokisht me zyrtarët serbë të sigurisë që vijnë në Kosovë.
“Reagimi inert dhe vetëm deklarativ shtetëror i Kosovës për arrestimin e zëvendësdrejtorit Jankoviq dhe policëve të Kosovës në Serbi, shpërfaq mungesën e mbështetjes serioze dhe pasigurinë për pjesëtarët e komunitetit serb në institucionet e sigurisë së Kosovës. Qeveria, Presidenca, MPB dhe MPJD do duhej të japin ultimatum të prerë për lirimin e menjëhershëm të tyre, në të kundërtën edhe Kosova do të veprojë me reciprocitet ndaj pjesëtarëve të institucioneve të sigurisë të Serbisë, kurdo që hyjnë në territorin e Kosovës”, ka shkruar Haradinaj në facebook.
Ndryshe, ministri i Punëve të Brendshme, Xhelal Sveçla ka bërë të ditur se zëvendësdrejtori i Policisë së Kosovës, Dejan Jankoviq, i arrestuar dje nga autoritetet serbe, është dërguar në paraburgim për 48 orë në shtetin serb.
“Gjatë ditës së djeshme është ndaluar edhe zëvendësdrejtori i Policisë së Kosovës, Dejan Jankoviq. Dhjetë pjesëtarë të policisë janë ndaluar pesë janë liruar mbrëmë kurse 4 sot, dhe zv.drejtori vazhdon të jetë i arrestuar. Ai është dërguar dje në Rashkë për tu marrë në pyetje, ndërsa sipas informatave të fundit ai është dërguar në paraburgim 48 orësh me akuzën për prishje të rendit kushtetues”, ka thënë Sveçla.
Presidentja Vjosa Osmani ka thënë se Serbia po i mban peng policët e Kosovës, teksa e ka quajtur fqinjin verior si shtet shovinist. Këto komente e para e shtetit i bëri në ceremoninë e diplomimit të kadetëve të Policisë së Kosovës. /Kosovatimes/
