Nënkryetari i Kuvendit, Enver Hoxhaj, gjatë një vizite në Austri, ka takuar disa deputetë të Parlamentit të Austrisë, përfshirë edhe ish-kancelarin austriak Sebastian Kurz.
Deputeti Hoxhaj, ka shkruar në Facebook se ka zhvilluar një bashkëbisedim me ish-kancelarin Kurz për më shumë angazhim nga Austria për integrimin e shpejtë të Kosovës në BE, paqe e siguri në Ballkan.
“Bashkëbisedim me mikun tim të madh, ish-kancelarin Sebastian Kurz për më shumë angazhim nga Austria për integrim të shpejtë të Kosovës në BE dhe për paqen e sigurinë në Ballkan”, ka shkruar Hoxhaj.
Ai gjithashtu gjatë ditës ka njoftuar se ka takuar edhe deputetin e Kuvendit të Austrisë, Helmut Brandstätter, për të cilin ka thënë se është një zë i fuqishëm evropian i Ballkanit.
Gjatë ditës së djeshme Hoxhaj ka takuar edhe tre deputetë austriakë nga tri parti të ndryshme, por siç u shpreh ai, të bashkuar për Kosovën.
