Presidentja e Kosovës,Vjosa Osmani ka thënë se është thellësisht e nderuar nga ndarja e Çmimit të Evropës i akorduar sot nga Fondacioni Pan-Evropian, Richard Coudenhove-Kalergi.
Ky çmim, sipas saj, është i rëndësisë së dyfishtë për të.
“Fiks para 20 viteve, Presidenti ynë historik Ibrahim Rugova ishte nderuar po me këtë çmim, rruga politike e të cilit mbetet trajektorja më e saktë politike dhe konstantja e pamohueshme e orientimit tonë të qartë euroatlantik. E dyta është motivi për të cilin është ndarë çmimi, pra mbrojtja e vlerave dhe orientimit euroatlantik nga kërcënimet, kauzë kjo për të cilën populli i Kosovës ka luftuar me dekada”, ka thënë Osmani.
Ajo e ka falënderuar Fondacionin Pan-Evropian Richard Coudenhove-Kalergi për çmimin e ndarë, për të, për shtetin tonë dhe për qytetarët tanë.
“Sot, Republika e Kosovës është një histori suksesi e përbashkët e popullit të Kosovës dhe e aleatëve tanë. Ky bashkëpunim solli lirinë, pavarësinë dhe demokracinë të cilat sot po i mbrojmë si vlera të përbashkëta. Uroj edhe homologen time, Presidenten moldave Maia Sandu, të cilës po ashtu i është ndarë ky çmim dhe me të cilën ndajmë jo vetëm të njëjtin orientim euroatlantik, teksa përballemi me të njëjtin kërcënim ndaj shteteve tona”, ka thënë Osmani. /Kosovatimes/
