Si traditë e vazhdueshme, Programi i Kombeve të Bashkuara për Zhvillim (UNDP) në Kosovë, së bashku me Zyrën e Presidentës dhe Ministrinë e Mjedisit, Planifikimit Hapësinor dhe Infrastrukturës, kanë nisur zyrtarisht një sërë ngjarjesh për të festuar Ditën e Tokës, duke shënuar një tjetër hap të rëndësishëm drejt ndërgjegjësimit dhe veprimit për klimën.
Ngjarja e inaugurimit u zhvillua në Kampusin e Universitetit të Prishtinës ‘Hasan Prishtina’, duke bashkuar partnerët kyç institucional dhe zhvillimor, duke përfshirë Z. Nuno Queirós, Përfaqësues i Përhershëm i UNDP-së, Z. Liburn Aliu, Ministër i Mjedisit, Planifikimit Hapësinor dhe Infrastrukturës, Z. Hajrullah Çeku, Ministër i Kulturës, Rinisë dhe Sportit, Z. Faton Peci, Ministër i Bujqësisë, Pylltarisë dhe Zhvillimit Rural, Znj. Arbërie Nagavci, Ministre e Arsimit, Shkencës, Teknologjisë dhe Inovacionit, përfaqësues institucional, ambasadorë dhe partnerë të tjerë të dalluar.
Ngjarja kulmoi me zbulimin e instalacionit artistik “Muri apo Premtimi i Prirët”, një strukturë e përbërë nga qese plastike të hedhura dhe materiale të tjera të ricikluara, që synon të shfaqë ndikimin e veprimeve njerëzore në premtimin për një të ardhme më të mirë.
Tema globale e Ditës së Tokës sivjet është Planeti kundër Plastikës, dhe instalacioni artistik i krijuar nga Driton Selmani, si pjesë e Projektit global të UNDP-së Premtimi për Klimën, është një paraqitje e fuqishme e kësaj sfide mjedisore. Instalacioni artistik ka një rëndësi të veçantë pasi është zhvilluar së bashku me nxënësit e shkollës. Ashtu si në vitet e mëparshme, ky inaugurim ka shërbyer për të nënvizuar rëndësinë e angazhimit të komunitetit dhe rolin e tij në formësimin e një të ardhmeje të qëndrueshme për planetin tonë.
Instalacioni artistik është pjesë e projektit “Climate Promise”, i zbatuar nga UNDP-ja në Kosovë me të cilin ne konfirmojmë përkushtimin për të nxitur iniciativat e ndërgjegjësimit mjedisor dhe qëndrueshmërisë dhe festimi i Ditës së Tokës shërben si një dëshmi e këtij angazhimi.
Rreth Instalacionit Artistik
Muri ose Premtimi i Prirët është një projekt publik që ngërthen në vete dinamikën komplekse mes njerëzimit dhe natyrës. Teksa kalojmë nëpër të, ky mur na inkurajon të reflektojmë mbi ndërgjegjësimin mjedisor dhe nevojën urgjente për praktika kolektive të qëndrueshme. Kjo strukturë, e përbërë nga qese të plastikës, të përdorura, dhe materiale të tjera të ricikluara, do të finalizohet me punimet artistike të fëmijëve; premtimet e tyre ndaj Planetit Tokë. Instalacioni u vendos në Kampusin e Universitetit të Prishtinës dhe do të qëndrojë aty nga 22 prilli deri më 5 maj, e pastaj do të shpërbëhet në pjesë më të vogla dhe do të rimodifikohet për ekspozim në disa institucione. Kjo është bërë e mundur falë dizajnit të tij qarkor dhe të qëndrueshëm.
Rreth Autorit
Driton Selmani është një artist nga Kosova, veprat e të cilit janë ekspozuar në mbarë botën. Selmani zbërthen normat shoqërore, të ushqyera nga skepticizmi i përjetshëm. Arti i tij riimagjinon besimet mes ndryshimeve kulturore, veçanërisht tranzicionit të pafund të vendit të tij të lindjes. Si vëzhgues dhe pjesëmarrës, ai gërsheton historinë personale në krijimet e tij. /Kosovatimes/
