Deputeti shqiptar në Kuvendin e Serbisë, Shaip Kamberi, ka njoftuar se është takuar me Eurodeputeten liberale të Parlamentit Evropian, Viola Von Cramon, të cilën e ka njoftuar për diskriminimet ndaj shqiptarëve të Luginës së Preshevës.
“Në këtë takim, u përballëm me çështjet që prekin të drejtat dhe barazinë e shqiptarëve në Luginën e Preshevës. Diskutuam thellësisht për rëndësinë e trajtimit të barabartë dhe të lirive individuale dhe kolektive, duke u bazuar në normat e konventave ndërkombëtare dhe evropiane për të drejtat e njeriut”, ka shkruar Kamberi.
Tutje ai ka thënë se e ka njoftuar Von Cramon për angazhimin në sigurimin e të drejtave të plota të shqiptarëve.
“Qëndrim të qartë të solidaritetit dhe angazhimit tonë për të adresuar diskriminimin e pasivizimin dhe për të ndihmuar në garantimin e të drejtave të plota për komunitetin shqiptar në Luginën e Preshevës”, ka shkruar ai.
