Policia e Kosovës ka arrestuar mbrëmë një 34-vjeçar, nën dyshimet për rastin “vrasje e rëndë në tentativë” të ndodhur më datë 17.02.2024 në rrugën “B” në kryeqytet.
Sipas njoftimit të policisë, me urdhër të prokurorit të shtetit, i dyshuari u dërgua në qendrën e mbajtjes prej 48 orësh.
“Mbrëmë në orët e vona, nga zyrtarët e njësisë së hetimeve të përgjithshme të Drejtorisë Rajonale të Policisë së Prishtinës në bashkëpunim edhe me policinë e aeroportit ndërkombëtar të Prishtinës, është arrestuar një person i dyshuar për rastin vrasje e rëndë në tentativë të ndodhur më datë 17.02.2024 rreth orës 19:45, në rrugën “B” në Prishtinë.
Arrestimi i të dyshuarit; K. K, mashkull, 34 vjeç, shtetas i Republikës së Kosovës, erdhi si rezultat i ndërmarrjes së veprimeve të specializuara operativo-policore, në kuadrin e procesit hetimor të këtij rasti”, thuhet në njoftim.
Theksohet se ndaj të dyshuarit me autorizimin e prokurorit të shtetit është iniciuar hetim në drejtim të veprës penale “Vrasja e rëndë në Tentativë”.
