Ministri i Punëve të Brendshme, Xhelal Sveçla, është takuar me drejtorin e përgjithshëm të Policisë së Kosovës, Gazmend Hoxha dhe kryeshefin e Inspektoratit të Policisë së Kosovës, Kushtrim Hodaj.
“Inspektorati Policor i Kosovës në bazë të mandatit të tij, vijon me inspektimet e rregullta dhe ato të jashtëzakonshme në Policinë e Kosovës përmes së cilave synon të kemi polici efikase, transparente dhe të përgjegjshme në detyrat e saj”, njofton MPB.
Në këtë takim u diskutua niveli i zbatimit të rekomandimeve, sfidat si dhe strategjia e përbashkët për zbatimin e masave për përmirësimin e efikasitetit dhe performancës së policisë.
“Ministri Sveçla përgëzoi dy institucionet për angazhimet e tyre deri më tani dhe ofroi mbështetjen e tij të vazhdueshme me qëllim të zbatimit të të gjitha rekomandimeve dhe përmirësimit të performancës së Policisë së Kosovës”, njofton MPB. /Kosovatimes/
