Kryeministri spanjoll Pedro Sanchez deklaroi se nuk do të japë dorëheqjen. Në një fjalim televiziv, ai tha se do të vazhdojë të shërbejë si kreu i qeverisë “me zell edhe më të madh”. Ai i quajti akuzat për korrupsion ndaj gruas së tij një fushatë për të njollosur familjen e tij, e cila ka 10 vite që vazhdon dhe sipas tij nuk do të ndalet në të ardhmen.
Çështja e dorëheqjes së mundshme të Sanchez u ngrit më 24 prill, kur një gjykatë spanjolle njoftoi se po fillonte një shqyrtim paraprak të një padie kundër gruas së kryeministrit, Begona Gomez. Ajo akuzohet për korrupsion dhe për përdorimin e pozicionit të saj për të lobuar për interesa private. Padia kundër Gomez u ngrit nga Manos Limpias (Duart e Pastra), një grup i dedikuar për ekspozimin e skemave të korrupsionit. Udhëheqësi i saj besohet të ketë lidhje me politikanë të ekstremit të djathtë. Manos Limpias pretendon se Gomez përdori statusin e saj si Zonjë e Parë për të tërhequr sponsorizime për programin master ku ajo jep një kurs. Gomez nuk i komentoi akuzat.
Në të njëjtën ditë, Sánchez njoftoi se po pezullonte aktivitetet e tij publike për të shqyrtuar nëse do të mbetej në detyrë. Ai premtoi se do të shpallte vendimin e tij të hënën.
Pas deklaratës së Sanchez, në Spanjë u mbajtën mitingje të shumta në mbështetje të tij . Mbështetësit e kryeministrit dhe Partisë së tij Socialiste kërkuan që kryeministri të qëndrojë në detyrë.
