Ministrja e Arsimit, Arbërie Nagavci, i ka bërë thirrje SBAShK-ut që të jetë më e matur për deklarimet që i bëjnë, duke shtuar se secila kërkesë e drejtuar është shqyrtuar.
Ministrja Nagavci ka thënë se takimet me zyrtarë të Sindikatë së Arsimit “nuk mbahen vetëm sa për të thënë”.
Sipas saj, çdo kërkesa e adresuar është shqyrtuar, dhe se nuk ka ndonjë kërkesë zyrtare me ndonjë temë të caktuar me të cilën do të bisedohet.
“Si Ministri e ministre jam çdo ditë afër mësimdhënësve e shkollave, jam tejet e interesuar që bashkë me të gjithë të punojmë për të përmirësuar cilësinë në arsim. Ka shumë punë për të bërë dhe shumë vullnet, kështu edhe kryetarin e SBAShK-ut, e tjerët i kisha ftuar që me qenë të matur në deklaratat tyre. Ne i kemi takuar vazhdimisht edhe unë, edhe zëvendësministri. Takimet nuk duhet të bëhen sa për t’u mbajtur takimet, por të ketë tema të caktuara për të cilat bisedojmë dhe punojmë bashkë”, ka deklaruar Nagavci.
Ndryshe, të dielën kreu i SBAShK-ut, Rrahman Jasharaj, ka deklaruar se ministrja Nagavci “është e urdhëruar nga kryeministri Albin Kurti të mos i takojë sindikatat”.
Në prag të 1 Majit, Ditës së Punëtorëve, SBAShK-u paralajmëron protestë, gjersa theksojnë se Qeveria nuk ka realizuar pritjet e SBAShK-ut me Ligjin e pagave. /Kosovatimes/
