Instituti Albanologjik i Prishtinës ka botuar veprën “Çështje sociolinguistike të terminologjisë në mediat e Kosovës dhe të Shqipërisë”, të punonjësit shkencor dhe profesorit universitar, prof Sejdi Gashit.
Sipas Gashit, autorit të këtij studimi, zhvillimi i shpejtë i mediave dhe i teknologjive të reja të komunikimit, gjatë viteve të fundit, ka ndikuar fuqishëm në gjuhë. Por, ndryshime në gjuhë, sipas tij, kanë sjellë edhe mediat tradicionale, si shtypi i shkruar, radioja dhe veçanërisht televizioni.
Gashi sqaron se studimi “Çështje sociolinguistike të terminologjisë në mediat e Kosovës dhe të Shqipërisë” synon të analizojë gjuhën e mediave, duke u fokusuar më së shumti te terminologjia, vështruar sipas një qasjeje sociolinguistike.
Ndërkaq, Naim Berisha, punonjës shkencor në Institutin Albanologjik të Prishtinës, që është njëri nga recensentët e këtij botimi, shprehet se “libri i ri i autorit Gashi, sjell para opinionit një kontribut të vyer nga fusha e gjuhësisë, duke trajtuar dhe hedhur dritë mbi shumë çështje aktuale dhe tematika me interes, sidomos në kontekstin e mediave”.
Sipas Berishës ky libër pritet të ketë një ndikim të rëndësishëm në botën akademike, “duke na sjell diçka të re që deri më sot nuk del e plotë në studimet tona për këtë fushë”.
Edhe recensenti tjetër i këtij botimi, Viktor Bakillari, studiues i gjuhës shqipe, leksikograf dhe përkthyes nga Tirana, e ka vlerësuar lart studimin e Gashit.
“Autori, larg së qeni purist, mban një qëndrim koherent nga nisja deri në përfundim të këtij studimi, duke goditur shpërdorimet që i bëhen gjuhës në medie. Ky punim është i domosdoshëm për terminologët, për studentët që mbrojnë tema masteri dhe doktorate në lëmin e terminologjisë, si edhe për mediat e shkruara dhe ato pamore”, tha ai.
