Zëvendësministri i Infrastrukturës, Hysen Durmishi, ka pranuar një ftesë nga Prokuroria Speciale për intervistë me datën 8 maj.
Në një postim në Facebook , Durmishi ka bërë të ditur se ai është ftuar për nënshkrimin e kontratave për rrugën Prishtinë – Podujevë.
“Dëshiroj të ju njoftoj se kam pranuar një ftesë nga prokuroria speciale për intervistë me datën 8 maj. Kur e mora ftesën mendova që më në fund po më ftojnë për të më pyetur për lëndën që e pata dorëzuar në prokurori speciale para gati tri viteve. Por jo, ata më kishin ftuar për nënshkrimin e kontratave për rrugën Prishtinë – Podujevë. Me gjasë dikujt po i pengon dinamika e punimeve në këtë projekt sepse gjithçka po ecën sipas planit”, ka shkruar ai.
Sipas Durmishit, është e pakuptimtë “që Prokuroria Speciale fton një zëvendësministër për intervistim duke u bazuar në spekulimet e një operatori ekonomik”.
“Të ftosh zv.ministrin për intervistim duke u bazuar në spekulimet e një operatori ekonomik, edhe pas vendimit të OSHP- së që na jep të drejtë neve si autoritet kontraktues, më duket sinqerisht e pakuptimtë. Ankesa e atij operatori ekonomik është shpallur e pabazuar edhe me vendim”, ka vazhduar ai .
Durmishi po ashtu tha se më datë 8 maj do të shkojë në Prokurori Speciale për të ju treguar që është i lumtur që është nënshkrues i kontratave për rrugën Prishtinë – Podujevë. /Kosovatimes/
