Shoqata e viktimave dhe dëshmitarëve të gjenocidit dhe shoqata “Lëvizja e nënave të enklavave të Srebrenicës dhe Zhepës” u dërguan një letër shumë organizatave ndërkombëtare, duke përfshirë NATO-n, EUFOR-in, PIC dhe OHR-në, ku iu referuan veprimeve të Serbisë në lidhje me rezolutën për Srebrenicën.Në letrën e dërguar nga shoqatat, theksohet se presidenti i Serbisë, Aleksandar Vuçiq, pretendon se do ta kundërshtojë rezolutën me të gjitha forcat, shkruan Klix .
“Duke pasur parasysh se Presidenti i Serbisë pretendon se Serbia do ta kundërshtojë me të gjitha forcat rezolutën për gjenocidin në Srebrenicë dhe se ai është krenar për rezultatet e fushatës kundër pranimit të Kosovës në Këshillin e Evropës dhe rezolutën për Srebrenicën, duke lënë të kuptohet se miratimi i rezolutës për gjenocidin në Srebrenicë do të ‘hapë kutinë e Pandorës’ e paprecedentë’. Pyesim veten se çfarë do të thotë hapja e ‘Kutisë së Pandorës’? Hapja e planit ‘bota serbe’ me armë të marra nga Rusia dhe Kina? A do të thotë kjo një luftë e re apo vazhdim i ëndrrave të parealizuara të presidentit të Serbisë nga vitet nëntëdhjetë?”, thuhet në letër.
Ata gjithashtu thanë se çdo kërcënim për paqen është shkelje serioze e Marrëveshjes së Paqes të Dejtonit.
“Vetë njoftimi i Presidentit të Serbisë për ‘hapjen’ e diçkaje është një thirrje për garantuesit e paqes në Bosnje dhe Hercegovinë për të mbrojtur paqen. Presidenti i Serbisë është një person që kërcënoi publikisht: ‘për një serb do të vrasim njëqind muslimanë’ dhe deklaratat e një personi të tillë duhet të merren seriozisht. U bëjmë thirrje të gjithë përfaqësuesve të bashkësisë ndërkombëtare që t’i marrin seriozisht kërcënimet e Aleksandër Vuçiqit dhe të vendosin urgjentisht forcat e NATO-s në kufirin e Bosnjë-Hercegovinës dhe Serbisë”, përfunduan ata.
