Kryeministri i vendit, Albin Kurti, ka takuar nënkryetaret e komunave veriore, me të cilat ka pasur bashkëbisedim të rëndësishëm.
Kurti, përmes rrjetit social ‘Facebook’, bëri të ditur se ai takim pune me nënkryetaren e Komunës së Mitrovicës së Veriut, Katarina Agjançiq, nënkryetaren e Komunës së Zveçanit, Natasha Tomaniq dhe nënkryetaren e Komunës së Leposaviqit, Marina Bogojeviq, ishte bërë në shoqëri edhe me ministrat Nenad Rashiq dhe Elbert Krasniqi.
Lidhur me këtë takim Kurti konsideron si një hap i duhur për të diskutuar me përfaqësues serbë të komunave veriore, me të është konsultuar mbi nevojat për shërbimet komunale që mund të ushtrohen të bashkërenduara në kuptim të lirisë së asociimit të komunave.
Ai, më tej shtoi se përfaqësueset e komunave veriore anëtarësimin e Kosovës në KiE e vlerësojnë si një hap të rëndësishëm për fuqizimin e komunave të tyre, duke i premtuar se këtë do t’ua shprehin edhe përfaqësuesve diplomatikë të QUINT-it.
“Komunikimi i shpeshtë dhe i rregullt është interesim, kujdes dhe vullnet i dyanshëm për të diskutuar e planifikuar projekte, dhe për adresuar sfida e vështirësi. U jam mirënjohës nënkryetareve Agjançiq, Tomaniq dhe Bogojeviq për punën e tyre të përditshme dhe kurajën për t’i shërbyer publikes dhe qytetarëve”, ka shkruar Kurti. /Kosovatimes/
