Manchester United ka pësuar humbje me rezultat të thellë 4-0 në udhëtim ndaj Crystal Palace në kuadër të javës së 36-të në Ligën Premier.
Dominimi i Crystal Palace u shfaq që në minutat e para të këtij takimi ku ata arritën që ta përfundojnë pjesën e parë me dy gola epërsi.
Michael Olise (12’) dribloi mirë dy lojtarë kundërshtar dhe shënoi një super gol për t’i dhënë avantazhin prej 1-0 vendasve.
Për të dyfishuar epërsinë e Palace u përkujdes Jean-Philippe Mateta (40’) i cili pranoi një pasim të bukur nga Chris Richards duke çuar topin në rrjetë për 2-0.
Crystal Palace e vazhdoi dominimin absolut edhe në pjesën e dytë ku arritën të gjejnë rrugën e rrjetës edhe në dy raste të tjera.
Tyrick Mitchell (58’) u gjend mjaft mirë në zonën e penalltisë dhe shënoi për rezultatin 3-0.
Goditjen përfundimtare Unitedit ia dha Michael Olise (66’) i cili kontrolloi një top nga Daniel Munoz dhe bëri një goditje të fuqishme e cila e la pa asnjë gjasë Andre Onanan për 4-0.
Kjo ndeshje shënoi një rekord të zi për ‘Djajtë e Kuq’ pasi për herë të parë në histori të klubit kanë humbur 13 ndeshje në një edicion të vetëm të Ligës Premier.
