Kryeministri Albin Kurti ka përkujtuar të hënën ish veprimtarin dhe politikanin Fehmi Agani në 25 vjetorin e vrasjes nga forcat serbe. Kurti tha se në mesin e shumë krimeve të kryera nga forcat policore të Serbisë gjatë luftës në Kosovë dhe të pazbardhura nga drejtësia, është rasti i eliminimit fizik të Fehmi Aganit, i vrarë më 6 maj 1999.
“Fehmi Agani u vra në kohën kur operacionet gjenocidale të forcave policore e ushtarake të Serbisë në Kosovë ishin në kulmin e tyre. Më 6 maj 1999, ai kishte hipur bashkë me familjen e tij në një nga trenat me të cilët po deportoheshin shqiptarët nga Kosova drejt Maqedonisë së Veriut. Rreth orës 13:00, treni i tyre u kthye sërish për në Fushë Kosovë, por pak pa arritur, treni u rrethua nga policia të cilët i zbritën të dëbuarit nga vagonët dhe i hipën në tre autobusa. Një polic serb e pikasi profesor Aganin mes të tjerëve, e ndau nga familjarët duke e zbritur nga autobusi dhe bashkë me policë të tjerë e hipën në një veturë të kuqe. Fehmi Agani u ekzekutua atë ditë, në afërsi të Lipjanit nën një urë. Prej atëherë dhe deri sot që u bënë 25 vite, rrethanat e vrasjes së Fehmi Aganit nuk janë sqaruar plotësisht, kurse ekzekutuesit e tij nuk janë nxjerrë para drejtësisë”, shkruan Kurti.
Pasi kishte diplomuar në filozofi, kishte magjistruar në shkenca politike dhe kishte doktoruar në sociologji, Fehmi Agani krijoi një profil të pasur si profesor universitar dhe studiues e autor, kujton kryeministri .
Vepra e tij e shkruar, sipas Kurtit, e ka ruajtur relevancën e saj teorike dhe historike falë origjinalitetit në qasje dhe aktualitetit të temave të trajtuara.
“Fehmi Agani ishte një nga intelektualët më të shquar dhe më të angazhuar politikisht në vitet ’90, si nënkryetar i partisë Lidhja Demokratike e Kosovës. Në dekadën e fundit të shekullit të kaluar, Fehmi Agani shihej si një figurë politike racionale që mund të shërbente si një busull mes turbullirave politike të kohës në Kosovë. Aktiviteti politik i tij dhe angazhimi i profesor Aganit për lirinë e Kosovës, e kanë fiksuar biografinë e tij në historinë politike të Kosovës”, shkruan Kurti.
Fehmi Agani do të kujtohet, sipas tij, përherë mes të rënëve të popullit tonë në përpjekjet dhe sakrificat për liri të Kosovës. /Kosovatimes/
