Presidentja e vendit, Vjosa Osmani, ka vlerësuar figurën e Luan Haradinajt, i cili shndërruar në emblemë të lirisë sonë.
Përmes rrjetit social ‘Facebook’ ka kujtuar figurën e Luan Haradinajt, për të cilin tha se luftoi për lirinë e Kosovës dhe ra hero në kufirin ndërmjet Kosovës dhe Shqipërisë.
“27-vjet më parë, në një përballje stoike me forcat e regjimit gjenocidal të Serbisë, Luan Haradinaj bie heroikisht, pak para se të vijë liria, të cilën luftëtari i UÇK-së me bashkëluftëtarë e patën ideal dhe amanet nga brezat, ndaj dëshmuan përkushtim, sakrificë dhe guxim”, ka theksuar Osmani, duke shtuar se në këtë përvjetor, përkulemi para veprës heroike të Luanit me bashkëluftëtarë të UÇK-së dhe nderojmë të gjithë dëshmorët tanë, të cilët e bën të mundshme lirinë tonë.
“Luani sikurse edhe familja Haradinaj dhanë shumë për lirinë e Kosovës, duke u shndërruar në emblemë të lirisë sonë, ndaj do të jenë të nderuar përherë. Qoftë i përhershëm kujtimi për Luanin dhe të gjithë ata që ranë në altarin e lirisë!”, ka shkruar presidentja Osmani. /Kosovatimes/
