Ish-presidenti i Sllovenisë, Borut Pahor, ka njoftuar se zyra e tij dhe Ministria e Punëve të Jashtme me shumë gjasa do ta përcjellin kandidaturën e tij për postin e të dërguarit special për dialogun ndërmjet Beogradit dhe Prishtinës në Bruksel javën e ardhshme, raportojnë mediat.
Në një intervistë për RTV Slloveni, Pahor tha se ka një sërë idesh se si të rifreskohet apo ringjallet dialogu ndërmjet Beogradit dhe Prishtinës, i cili aktualisht është në ngecje. Ai beson se Sllovenia, ashtu si ai vetë, ka statusin e “ndërmjetësuesit të ndershëm”.
Pahor tha se po përgatitet për një pozicion të mundshëm “me shumë kujdes dhe përgjegjësi” dhe shtoi se mbështetja që gëzon në Slloveni do të thotë shumë për të.
Gjatë konferencës ndërkombëtare për Ballkanin Perëndimor muajin e kaluar, ish-presidenti i Sllovenisë përsëri shprehu dëshirën për të marrë këtë pozicion dhe e mbështeti edhe kryeministri Robert Golob .
Së fundmi ai njoftoi se po punon për një draft për vazhdimin e dialogut dhe koordinimit me Përfaqësuesin e Lartë të BE-së për Punë të Jashtme dhe Politikë të Sigurisë, Josep Borrella, shtetet anëtare të BE-së dhe vendet e Quinte-së, përfshirë SHBA-në, Britaninë, Francën, Italinë dhe Gjermaninë.
I dërguari i posaçëm për dialogun ndërmjet Beogradit dhe Prishtinës emërohet nga Përfaqësuesja e Lartë e BE-së për Politikë të Jashtme dhe Siguri, por vendimin përfundimtar e marrin liderët e BE-së.
