“Amendamentet e Rezolutës së OKB-së për gjenocidin në Srebrenicë të shpallura nga Mali i Zi nuk janë shkruar në Mal të Zi, por në Serbi” . Kështu deklaroi Daliborka Uljareviq, drejtoreshë ekzekutive e Qendrës për edukim qytetar nga Podgorica, e ftuar në programin e mëngjesit të Nova TV Serbi.
Kujtojmë se Qeveria e Malit të Zi ka njoftuar se me ndërmjetësimin e SHBA-ve do të dorëzojë dy amendamente për projekt-rezolutën gjermane për gjenocidin në Srebrenicë, të cilën do ta shpallë Asambleja e Përgjithshme e OKB-së.
Duke komentuar amendamentet, Daliborka Uljareviq përkujtoi se Qeveria e Malit të Zi kishte hezituar gjatë të mbështeste Rezolutën e OKB-së për Srebrenicën, me shpjegimin se “nuk duhet të merremi me të kaluarën, por me të ardhmen dhe problemet e qytetarëve”.
Pas mbështetjes në parim të Rezolutës, Qeveria e Malit të Zi u gjend nën presionin e shumicës së Malit të Zi, gjegjësisht partive pro-serbe që janë pjesë e shumicës qeverisëse. Dy amendamentet e propozuara janë rezultat i atij presioni, sipas znj. Uljareviq.
Ajo e konsideron të pakuptimtë amendamentin e parë sepse në tekstin e Rezolutës askund nuk përmendet faji kolektiv i popullit serb. “ Në tetë vendime gjyqësore për gjenocid në Tribunalin e Hagës është konfirmuar fajësia individuale. Rezoluta e OKB-së kërkon që të respektohen gjykimet përfundimtare dhe të mos lavdërohen kriminelët e luftës ”, pohon analisti nga Mali i Zi.
Daliborka Uljareviq vuri në dukje se Qeveria e Malit të Zi nuk ka shpjeguar se çfarë nënkupton “ndërmjetësimi i Shteteve të Bashkuara të Amerikës”. “Unë supozoj se bëhet fjalë për një lloj asistence teknike që nuk është përfshirë në përmbajtjen e Rezolutës ”, tha ajo.
Duke iu përgjigjur pyetjes se si do të ndikojë miratimi i Rezolutës së OKB-së për Srebrenicën në marrëdhëniet në rajon, Daliborka Uljareviq tha se faktori kryesor përçarës në rajon dhe ai që cenon stabilitetin e tij është Aleksandar Vuçiq , presidenti i Serbisë. “Vuçiq është ai i cili, përmes xhelatëve të tij në vende të tjera, vë në pikëpyetje sovranitetin dhe minon integritetin e tyre territorial ”, tha një analist i njohur nga Podgorica.
