1 milion e 204 mijë e 560 është numri i qytetarëve të regjistruar deri më tani sipas Agjencisë së Statistikave të Kosovës.
Ushtruesi i detyrës së Kryeshefit ekzekutiv të Agjencisë së Statistikave të Kosovës, Avni Kastrati ka thënë se hezitimi nga komuniteti serb për t’u regjistruar është ende i pranishëm.
“Në të gjitha komunat e Kosovës ka regjistrim, të gjitha komunitet janë t`u marrë pjesë. Ka ende një hezitim nga komuniteti serb në veri por një pjesë e tyre është duke u regjistruar. Ka një hezitim e përsërisë por një pjesë është duke u regjistruar. Në pergjithësi projekti i regjistrimit është duke shkuar sipas parashikimeve”, ka thënë Kastrati.
Tutje Kastrati tha se disa komuna kanë qenë më aktive e disa jo.
“Deri më tani procesi është duke i afruar fundit. Nuk kemi telashe në aspekin profesional dhe në teren. Nuk kemi refuzime të mëdha të qytetarëve dhe ato pak që janë pas disa diskutimeve po zgjidhen. Disa komuna kanë qenë shumë aktive dhe kanë zhvilluar të gjitha aktivitetet por ka dhe disa komuna që nuk kanë qenë shumë aktive. Edhe dhjetë ditë kanë mbetur deri në përfundim të procesit. Deri më tani, deri më dje (06.05.2024) janë regjistruar 1,204,560 qytetarë”.
Ndryshe, në Kosovë që nga 05.04.2024 ka nisur regjistrimi i popullsisë, i cili pritet të zgjasë deri më 17.05.2024.
