Kompania farmaceutike britaniko-suedeze AstraZeneca ka njoftuar se do të tërheqë vaksinën e saj Covid-19 disa muaj pasi pranoi në një gjykatë në Londër se vaksina mund të shkaktojë efekte anësore të rralla dhe të rrezikshme.Vaksina nuk mund të përdoret më në Bashkimin Evropian, pasi kompania tërhoqi vullnetarisht autorizimin e saj të marketingut.
Kërkesa për tërheqjen e vaksinës është dorëzuar më 5 mars dhe ka hyrë në fuqi sot.
Vaksina nuk prodhohet më
Aplikime të ngjashme do të bëhen në muajt e ardhshëm në Britaninë e Madhe dhe vende të tjera që kanë miratuar vaksinën, e njohur si Vaxevria.
AstraZeneca njoftoi se vaksina u hoq nga tregu për arsye komerciale dhe se nuk prodhohet më dhe nuk furnizohet më, pasi është zëvendësuar me vaksina të përditësuara që janë efektive kundër shtameve të reja të Covid-19, transmeton Telegrafi britanik.
Vaxevria është vënë nën një shqyrtim intensiv muajt e fundit për shkak të një efekti anësor shumë të rrallë, i cili shkakton mpiksje gjaku dhe numërim të ulët të trombociteve në gjak.
Në dokumentet gjyqësore të paraqitura në Gjykatën e Lartë në Londër në shkurt, AstraZeneca pranoi se vaksina “mund, në raste shumë të rralla, të shkaktojë TTS ” .
TTS, tromboza me sindromën e trombocitopenisë, është lidhur me të paktën 81 vdekje në MB, si dhe me qindra efekte anësore serioze.
“Kemi shpëtuar mbi 6.5 milionë jetë”
AstraZeneca është duke u paditur nga më shumë se 50 viktima dhe të afërm të dyshuar në këtë çështje, e cila tani është në Gjykatën e Lartë.
Kompania pretendon se vendimi për tërheqjen e vaksinës nuk lidhet me një padi apo një pranim se mund të shkaktojë TTS, por se koha është thjesht e rastësishme.
– Kemi zhvilluar vaksina për shtamet e reja të Covid-19 dhe kemi tepricë. Kjo çoi në një rënie të kërkesës për Vaxevria, e cila nuk prodhohet më ose nuk furnizohet më. Prandaj, AstraZeneca ka vendosur të iniciojë tërheqjen e autorizimeve të marketingut për Vaxevria në Evropë – njoftoi kompania farmaceutike.
Në deklaratë thuhet gjithashtu se kompania është “ krenar” për kontributin e saj në përfundimin e pandemisë globale Covid 19 dhe pretendon se në vitin e parë, imunizimi me këtë vaksinë shpëtoi mbi 6.5 milionë jetë përmes tre miliardë dozave të dorëzuara në mbarë botën.
