Federata Shqiptare e Futbollit e ka paraqitur kandidaturën e saj në UEFA për organizimin e Kampionatit Evropian 2027 për Kombëtaret e 21-vjeçarëve.
Lajmin e ka bërë të ditur vet FSHF-ja përmes një komunikate në faqen e saj zyrtare. Por, ajo që çoi pluhur në opinion është fakti që Shqipëria kandidaturën për organizimin e këtij kampionati e ka bërë në partneritet me Serbinë.
“Pas organizimit të suksesshëm të finales së parë të UEFA Conference League në Tiranë në vitin 2022, dhe fitimit të së drejtës për të organizuar finalet e Kampionatit Europian 2025 për grupmoshën U-17, FSHF kërkon të organizojë një tjetër event madhor të futbollit europian. Shqipëria është një nga kandidatet kryesore për të organizuar ndeshjet finale të Kampionatit Europian 2027 për ekipet kombëtare U-21. FSHF i ka dërguar kërkesën UEFA-s, që Shqipëria të jetë një nga vendet pritëse të finaleve të këtij kompeticioni”, thuhet fillimisht në komunikatë.
Ndërkohë, tutje thuhet se ‘duke qenë se nuk plotësohen kushtet sa i përket numrit të stadiumeve që kërkohen në mënyrë që vendi ynë të presë të gjitha ndeshjet finale të Kampionatit Europian U-21, FSHF do të bashkëpunojë me Federatën Serbe të Futbollit për të pritur së bashku fazën finale të EURO 2027 për grupmoshën U-21”.
Ky, sipas FSHF-së, është pa asnjë dyshim një projekt shumë ambicioz, që do ta vendoste Shqipërinë në qendër të vëmendjes futbollistike të gjithë kontinentit.
Megjithatë, menjëherë pas këtij lajmi rrjetet sociale janë vërshuar nga komentet kundër FSHF-së, që ka zgjedhur pikërisht Serbinë, për partnere në kandidaturën për organizimin e Euro 2027.
