Presidentja e Kosovës, Vjosa Osmani gjatë qëndrimit në Shtetet e Bashkuara të Amerikës ka takuar kongrestitin amerikan Keith Self, njërin nga mbështetësit e vazhdueshëm të komunitetit shqiptaro-amerikan.
“Gjatë vizitës në Teksas, pata kënaqësinë ta takoj edhe Kongresmenin republikan Keith Self, një zë i fuqishëm i mbrojtjes së aleancës mes Kosovës e SHBA-ve, si dhe mbështetës i vazhdueshëm i komunitetit shqiptaro-amerikan”, ka shkruar Osmani në rrjetin e saj shoqëror Facebook.
Kujtojmë se gjatë qëndrimit në SHBA, presidentja Osmani e ka takuar edhe ish-presidentin amerikan, George W. Bush. Ajo ka kujtuar frazën e famshme të tij për Kosovën në Tiranë “Mjaft është mjaft. Kosova është e pavarur”.
“Mjaft është mjaft. Kosova është e pavarur”, është fraza paralajmëruese për pavarësinë e Kosovës, e presidentit George W. Bush në Tiranë më 2007, e cila do të mbetet e gdhendur në analet e historisë si një afirmim i vendosur i të drejtës së Kosovës për të qenë e pavarur dhe sovrane”, ka shkruar Osmani ditë më parë.
