Peceta mbi të cilën Lionel Messi nënshkroi për Barcelonën në vitin 2000 është shitur për 760 mijë paund ose rreth 888 mijë euro, njoftoi të premten shtëpia britanike e ankandeve “Bonhams”.
Peceta ndryshoi fatin e Barcelonës dhe Messit, i cili u bë një nga lojtarët më të mëdhenj të të gjitha kohërave”, tha Bonhams.
Përveç asaj të Messit, në pecetë ka edhe firmën e Carles Resac, drejtori sportiv i skuadrës në atë kohë, si dhe Josep Maria Minguela, një skaut që njohu potencialin e argjentinasit.
Peceta u mbajt në një kasafortë për vite nga menaxheri i Messit në atë kohë, Horacio Gaggioli.
“Në Barcelonë, më 14 dhjetor 2000, në prani të zotërinjve Minguela dhe Horace, Carles Ressac, Drejtor Sportiv i Barcelonës, pranon, nën përgjegjësinë e tij dhe pa marrë parasysh ndonjë mendim të kundërt, të nënshkruajë një kontratë me lojtarin Lionel Messi, me kusht që të respektojmë shumat e dakorduara”, shkruhej në atë kohë në pecetë.
Messi kaloi 17 vite në Barcelonë. Ai fitoi gjithçka që mund të fitohet dhe u bë legjenda më e madhe e klubit katalanas. Në vitin 2021, ai u largua nga Barcelona dhe u transferua në Paris Saint-Germain. Ai qëndroi në skuadrën franceze deri në vitin 2023 dhe më pas u transferua te Interi nga Miami, ku luan edhe sot.
