AGK-ja, e mbështet gazetaren Qëndresa Krelani, kërkon të ndalen fushatat denigruese kundër saj.
“Gazetarja e sportit në televizionin publik të Kosovës, RTK, Qëndresa Krelani – Qeqa, është bërë sërish subjekt i fushatave denigruese online. Në disa video të shpërndara së fundi, vihet në pah në mënyrë nënçmuese deklarata e ish-trajnerit të Kombëtares së Kosovës, Ghila i cili kishte deklaruar se ka marrë parasysh këshillat e gazetares për formacionin që kishte vënë në fushë në një prej ndeshjeve”, thuhet në reagimin e AGK-së.
AGK-ja, thotë se i dënon fuqishëm këto fushata dhe u bën thirrje të gjithë akterëve, duke përfshirë kolegë të sportit, që t’i ndalojnë ato menjëherë.
“Krelani është një shembull i jashtëzakonshëm i një gruaje në gazetarinë sportive, të super-dominuar nga burrat. Puna e saj shërben si shembull e inkurajim për të tjera gra që të merren me gazetari sportive, dhe fushatat kundër saj e dëmtojnë rëndë këtë kauzë”, thuhet në reagimin e AGK-së. /Kosovatimes/