Vdes presidenti i Iranit, Ebrahim Raisi: në rrëzimin e helikopterit vdiq edhe ministri i Jashtëm

Presidenti iranian Ebrahim Raisi, ministri i Jashtëm Hossein Amir-Abdollahian dhe disa të tjerë u vranë në një përplasje helikopteri që ndodhi dje, të dielën, në veriperëndim të Iranit, njoftoi televizioni shtetëror, siç raporton BBC.

Në rrjetet sociale të agjencisë shtetërore iraniane të lajmeve IRNA, siç raporton BBC , janë publikuar pamjet me dron, të cilat sipas agjencisë tregojnë rrënojat e helikopterit të Presidentit Raisi.

Pamjet, të kapura nga Gjysmëhëna e Kuqe, duket se tregojnë bishtin e një helikopteri pranë një pjese të madhe të dheut të djegur në një kodër të mbuluar me mbeturina. Ekipet e shpëtimit thanë se nuk kishte shenja jete në vendngjarje.

Ebrahim Raisi është president i Iranit që nga viti 2021 dhe drejton vendin në sfondin e mosmarrëveshjeve në nivel ndërkombëtar dhe me sfida të brendshme, vlerësoi mbrëmë agjencia France Press.

Raisi u zgjodh më 18 qershor 2021 në raundin e parë të votimit të shënuar me abstenim rekord për zgjedhjet presidenciale dhe mungesë të konkurrentëve të fortë.

Ai pasoi të moderuarin Hassan Rouhani, i cili e mundi atë në zgjedhjet presidenciale të 2017 dhe nuk ishte në gjendje të kandidonte përsëri pas dy mandatesh radhazi.

Raisi doli i forcuar pas zgjedhjeve parlamentare të mbajtura në mars dhe në mes të majit. Ishin zgjedhjet e para kombëtare që nga lëvizja protestuese që tronditi Iranin në fund të vitit 2022 pas vdekjes së Mahsa Amini, një gruaje e re e arrestuar për shkelje të një kodi të rreptë të veshjes.

Pas këtyre zgjedhjeve, presidenti i Iranit përshëndeti “një disfatë të re historike të shkaktuar ndaj armiqve të Iranit pas trazirave” në 2022.

https://farsnews.ir/Sayeh/1716175852166439740/Drone-Footage-Captures-Helicopter-Wreckage-in-Iranian-President-Incident