Analistët në RTK Prime e kanë cilësuar si dështim të dëshmive për procesin, heqjen e heqjen e 10 dëshmitarëve nga Zyra e Prokurorisë Speciale për gjykimin e ish-krerëve të UÇK-së në Hagë.
“Pas një analize të gjithë procesit gjyqësor, ata e kanë vërejtur se dëshmitarët nuk mund të dëshmojnë asnjë fakt me relevancë për procedurën dhe dëgjimi i tyre vetëm do ta zvarrisë procedurën. Prandaj pajtohem se Prokuroria ka bërë një vlerësim të gabuar që t’i fus ata persona në listën e dëshmitarëve”, ka thënë avokati i së drejtës penale ndërkombëtare, Artan Çerkini.
Çerkini tutje ka thënë se dëshmitë e këtyre dëshmitarëve kanë qenë të gabuara.
“Kualifikimet juridike për faktet për të cilat Prokuroria ka mëtuar t’i provojë në proces kanë qenë fillimisht të gabuara ngase dëgjimi i dëshmitarit është provë. Prokuroria mëton që me dëshmitarë të provojë fakte me relevantë për veprat për të cilat akuzohen të pandehurit”, ka thënë Çerkini.
Ndërkaq ish-ushtarja e UÇK-së, Aida Dërguti, e ka cilësuar gjithë procesin gjyqësor si të shoqëruar me shkelje të ndryshme të të drejtave të njeriut.
“Është e pakuptimtë të vazhdohet tutje me një proces të lodhshëm, të mërzitshëm dhe shumë poshtërues që fund e krye është politik. Tashmë të gjitha këto problemet që shfaqen gjatë procesit, ku mundohen t’i arsyetojnë si mungesë e mospërgatitjes së mjaftueshëm për një proces gjyqësor, për të cilat janë bërë hetime qe dy dekada”, ka thënë Dërguti.
