Presidentja e Kosovës, Vjosa Osmani, ka kujtuar 25-vjetorin e masakrës në qytetin e Vushtrrisë, duke thënë se më 22 maj 1999, regjimi gjenocidal i Serbisë tentoi t`i shfarosë banorët shqiptarë në rrugën “Abdullah Shabani”, në Vushtrri.
Tutje tha Osmani se pasi që regjimi gjenocidal dëboi banorët me dhunë nga shtëpitë e tyre, 68 prej tyre, në mesin e të cilëve fëmijë e të moshuar, i mbajti peng në shtëpinë e Kahriman Pasomës dhe pas torturave mizore i vranë.
“Banorë të tjerë, regjimi kriminal serb i tuboi në sallën e sportit dhe në burgun e Smrekonicës, ku pas torturave dhe plaçkitjes i dëboi dhunshëm për në Shqipëri. Gjurmët e krimit u përpoqën t`i fshehin, teksa trupat e shumicës së të vrarëve u gjetën në varrezën masive në Batajnicë të Serbisë”, tha Osmani.
Presidentja Osmani tha se drejtësia për viktimat e masakrës së Vushtrrisë, sikurse edhe për të gjitha viktimat e masakrave të tjera në gjithë Kosovën, është e domosdoshme dhe përkushtim i vazhdueshëm.
“Qoftë i përhershëm kujtimi për martirët e Vushtrrisë dhe të gjithë të rënët për liri”, ka kujtuar Osmani. /Kosovatimes/
