Trajneri spanjoll, Xavi ka hapur zemrën për të treguar ndjenjat e tij pasi u shkarkua si trajner i Barcelonës para ndeshjes së fundit të sezonit 2023/24.
Drejtuesit e Barcelonës morën vendim për të shkarkuar trajnerin Xavi pas përfundimit të këtij sezoni, por kjo nuk i ka penguar trajnerit për të respektuar vendimin.
“Jam mirë. Sigurisht që ishin ditë të vështira, jo të lehta. Por mirë, unë jam këtu me mendje të kthjellët dhe dua të them se jam krenar për dy vitet e gjysmë si trajner. Nuk ishte e lehtë”, ka thënë fillimisht Xavi.
“Unë e respektoj vendimin e presidentit për të më shkarkuar, është ai që vendos. Unë gjithmonë do të jem tifoz i Barcelonës dhe do të mbështes klubin”.
“Më është dashur të marr vendime shumë të rëndësishme. Nuk jam penduar për asgjë. Kam qenë i vërtet dhe i sinqertë me lojtarët, drejtuesit dhe drejtorët sportivë. Mendoj se kemi punuar me shumë nder dhe shumë dashuri për këtë klub”, përfundoi trajneri spanjoll.
Xavi pritet të zëvendësohet nga Hansi Flick si trajner i ri i Barcelonës pas ndeshjes kundër Sevillas.
Vendimi për të shkarkuar spanjollin u mor pas komenteve të tij të fundit të diskutueshme ku Xavi pretendoi se Barça nuk mund të konkurronte për çmimet kryesore sezonin e ardhshëm pas problemeve financiare.
