Ministra e Punëve të Jashtme dhe Diasporës, Donika Gërvalla, në një tryezë diskutimi në Institutin “Hudson” në Uashington, potencoi se Serbia është kthyer në kërcënim për rajonin.
Sipas komunikatës së MPJD-së, Gërvalla ka thënë se Kosova e Bosnja-Hercegovina po kërcënohen nga ky shtet.
“Si aleate, madje edhe satelit i Rusisë, ajo jo vetëm që sulmon shtetet fqinje, siç ishte rasti me 24 shtatorin e vitit të kaluar në Kosovë, por edhe i garanton Rusisë, Kinës dhe tashmë edhe Iranit hapësirë të mjaftueshme për të vepruar në Evropë nga thellësia e Ballkanit Perëndimor”, tha Ministrja Gërvalla.
Ministrja Gërvalla theksoi rëndësinë e ndërrimit të strategjisë së demokracive perëndimore në raport me Serbinë si kundërshtaren më të fuqishme të vlerave Perëndimore dhe demokratike në Evropë dhe domosdoshmërinë e konfrontimit të Serbisë me rrezikun që paraqet për rajonin, por edhe për paqen në Evropë.
Ndër të tjera në këtë takim të quajtur “Synime dhe shqetësime Rajonale”, Gërvalla theksoi përkushtimin e vazhdueshëm të Kosovës për vlerat demokratike dhe vullnetin e palëkundur për anëtarësim në NATO dhe BE. /Kosovatimes/
